خافو ربنا بقلم الشاعر.. محمد الشاذلى

(خافو ربنا). ١/ديسمبر/٢٠١٦
***********
شراهة الناس لمكسبها بقت ...........بشعة

لا هاممهم متاعب الخلق ........ولا راحمين

يمصوا ف دم الناس... والذمة بقت واسعة

دي الوحوش واكلا بعضها غلبهم بني ادمين

الغلا نازل على ضهور العباد ............لسعة

بيكوى ف خلق............... اساساً هما مكويين

مابين مصاريف لأكل البيت........... وللجامعة

وبين مصاريف المدارس......واللا ماملاحقين

ارحم يارب ................تجارنا بقت جشعة

حتى الوشوش اتغيرت بقوا ........سعرانين

الناس بتصرخ ولا ودن المسؤلين......سامعة

تحس بناس ف سكوتها الخرسان......... انين

وناس ماشبعانة تقولش جاتلهم .......فجعة

لمكسب لا هو حق .مش اكتر من فراغة عين

طب فين تروح الخلق وامتى تحس بالشبعه

ياللي ماصدقت تمسك فرصة ...ع المساكين

اكسب بس بالمعقول دي فلوس الحرام ولعة

ح تكسبها ..تكنزها. وتتحاسب ب ليه ومنين

اعمل حساب لدعوة..تكون ......ساعة جمعة

يقبلها ربى ويحاسبك......دا حق المظلومين

الشاعر.. محمد الشاذلى